អាជ្ញាធរជាតិអប្សរាស្វាគមន៍គ្រប់ស្ថាប័ន ចូលរួមដាំកូនឈើ ក្នុងរមណីយដ្ឋានអង្គរ

(ភ្នំពេញ)៖ អាជ្ញាធរជាតិអប្សរា ក្រោមកិច្ចសហការជាមួយ រដ្ឋបាលខេត្តសៀមរាប និងធនាគារ CIMB បានរៀបចំពិធីដាំកូនឈើចំនួន ១,៥០០ដើម នៅបរិវេណប្រាសាទបន្ទាយក្ដី ក្រោមប្រធានបទ «យើងដាំ យើងចំណាំ យើងថែរក្សា ប្រាង្គប្រាសាទ ដែលជាបេតិកភណ្ឌមនុស្សជាតិ»។

ក្នុងពិធីនៅពេលនោះ លោក ឡុង កុសល អ្នកនាំពាក្យអាជ្ញាធរជាតិអប្សរា ក្នុងនាមលោក ហង់ ពៅ អគ្គនាយកអាជ្ញាធរជាតិអប្សរា បានសម្ដែងអារម្មណ៍រីករាយ និងរំពឹងថា ស្ថាប័នសាធារណៈពាក់ព័ន្ធនិង ស្ថាប័នឯកជនដទៃទៀត នឹងបន្តចូលរួមកាន់តែច្រើន ក្នុងការដាំកូនឈើក្នុងរមណីយដ្ឋានអង្គរ ព្រោះថា កិច្ចការថែទាំបេតិកភណ្ឌ មិនមែនជាភារកិច្ចអាជ្ញាធរជាតិអប្សរា តែម្នាក់ឯងនោះទេ ប៉ុន្តែជាភារកិច្ចសម្រាប់កូនខ្មែរគ្រប់រូប។ មានវត្តមានក្នុងពិធីនោះ រួមមានលោក ពិន ប្រាកដ អភិបាលរងនៃគណៈអភិបាលខេត្តសៀមរាប លោក ប៊ុន យីម នាយកប្រតិបត្តិនៃធនាគារ CIMB លោក ឈិត បូរ៉ាវុធ ប្រធានក្រុមមេធាវីអាជ្ញាធរជាតិអប្សរា ព្រមទាំងព្រះសង្ឃ បុគ្គលិកធនាគារ CIMB និងមន្រ្តី បុគ្គលិកអាជ្ញាធរជាតិអប្សរាសរុបទាំងអស់ប្រមាណជាង៦០០ អង្គ/នាក់។

លោក ឡុង កុសល បានបន្តលើកទឹកចិត្តដល់សាធារណជន ស្ថាប័នរដ្ឋ និងឯកជននានា ដែលមានបំណងរៀបចំពិធីដាំកូនឈើ ក្នុងតំបន់រមណីយដ្ឋានអង្គរ ដើម្បីរួមចំណែកលើកិច្ចការអភិរក្សប្រាង្គប្រាសាទក្នុងរមណីយដ្ឋាន បេតិកភណ្ឌពិភពលោកអង្គរ ព្រោះព្រៃឈើបានចូលរួមចំណែក យ៉ាងសំខាន់ក្នុងកិច្ចការការពារ និងអភិរក្សបាង្គប្រាសាទ។

លោកក៏បានជម្រាបជូនអំពីគម្រោង «ដើមឈើខ្ញុំ នៅអង្គរ» ដែលគ្រោងនឹងរៀបចំឡើងដោយអាជ្ញាធរជាតិអប្សរា ក្នុងស្មារតីលើកទឹកចិត្តសាធារណជនគ្រប់រូប មានចំណែកអភិរក្សប្រាសាទបុរាណខ្មែរតាមរយៈការដាំកូនឈើក្រោមរូបភាព ចូលរួមធ្វើ ចូលរួមគិត និងចូលរួមថែរក្សា។

គួបញ្ជាក់ថា កូនឈើដែលដាំក្នុងពិធីខាងលើសរុបចំនួន ១,៥០០ ដើម ដែលរួមមាន គ្រញូង ៣០០ដើម ធ្នង់ ២០៥ដើម បេង ១០០ដើម នាងនួន ២០ដើម ស្រឡៅ ១៥០ដើម ឈើទាល ៣០០ដើម កកោះ ៥០ដើម ពពាល ៥០ដើម និងសុគ្រំ ៥០ដើម៕ (ដោយ៖ ពិជ័យបុត្រ)