ចោរឆក់ទៀតហើយ! ឆក់បានជាហូរហែរ តែក៏នៅរត់មិនរួចពីគុក! អាវុធរាជធានីភ្នំពេញចាប់ខ្លួនបញ្ជូនទៅតុលាការ ( Video inside)

(ភ្នំពេញ)៖ អាវុធហត្ថរាជធានីភ្នំពេញ នៅរសៀលថ្ងៃទី១២ ខែធ្នូ ឆ្នាំ២០១៧ បានបញ្ជូនចោឆក់ម្នាក់ទៀតហើយ ទៅតុលាការដើម្បីផ្តន្ទាទោសតាមច្បាប់ បន្ទាប់ពីទើបតែបញ្ជូន០២នាក់ ទៅតុលាការកាលពីថ្ងៃទី១១ ខែធ្នូ ឆ្នាំ២០១៧។

បើតាមការឲ្យដឹងរបស់ មន្ត្រីកងរាជអាវុធហត្ថរាជធានីភ្នំពេញបញ្ជាក់ថា ជនសង្ស័យដែលជាចោរឆក់ម្នាក់ថ្មីនេះ ត្រូវបានកម្លាំងអាវុធហត្ថខណ្ឌដូនពេញ ស្រាវជ្រាវ និងឃាត់ខ្លួនបានកាលពីរសៀលម៉ោង១៥៖០០នាទី ថ្ងៃទី១០ ខែធ្នូ ឆ្នាំ២០១៧ គឺក្រោយពេលដែលជនសង្ស័យរូបនេះ រួមជាមួយបក្ខពួក បានធ្វើសកម្មភាពឆក់កាបូប ជនបរទេស កាលពីវេលាម៉ោង០៣៖០០នាទីយប់រំលងអាធ្រាត្រ ថ្ងៃទី១០ ខែធ្នូ ឆ្នាំ២០១៧។

សមត្ថកិច្ចដដែលបានបញ្ជាក់ថា តាមរយៈវិធានការជំនាញ ជនសង្ស័យព្រមសារភាពថា រូបគេមានឈ្មោះ មិត្ត ភារម្យ អាយុ១៧ឆ្នាំ សព្វថ្ងៃមានបក្ខពួកចំនួន០៨នាក់ គឺឈ្មោះឈីត, ឈ្មោះជ្រុយ, ឈ្មោះមករា, ឈ្មោះសាល, ឈ្មោះទីង, ឈ្មោះទួតូច, ឈ្មោះទួធំ និងឈ្មោះណាក់ តែងធ្វើសកម្មភាពឆក់វត្ថុមានតម្លៃ ពីអ្នកដំណើរតាមផ្លូវជាញឹកញាប់ ក្នុងភូមិសាស្ត្ររាជធានីភ្នំពេញ ជាពិសេសឆក់ជនបរទេស ដោយប្រើប្រាស់ម៉ូតូ០៤គ្រឿង។ ក្នុងរយៈកាលកន្លងមករូបខ្លួន (មិត្ត ភារម្យ) ចាំ និងដឹងមិនអស់ទេថា ក្រុមខ្លួនទាំង០៨នាក់ ធ្វើសកម្មភាពឆក់បានប៉ុន្មានដង និងនៅកន្លែងណាខ្លះ ព្រោះច្រើនពេក ហើយពេលខ្លះក៏ឆក់បានសម្រេច ខ្លះក៏ឆក់មិនបានសម្រេច ហើយពេលខ្លះក៏ចែកផ្លូវគ្នាឆក់រៀងៗខ្លួន។

តែក្នុងអំឡុងឆ្នាំ២០១៧នេះ រូបខ្លួន (មិត្ត ភារម្យ) ចាំបានថាបានចូលរួមជាមួយបក្ខពួក ឆក់ជនបរទេសបាន ១២លើកគឺ៖

លើកទី១៖ ឆក់បានទូរស័ព្ទដៃ០១គ្រឿងម៉ាក iPhone6 និងការបូបដៃមានប្រាក់២០០ដុល្លារអាមេរិក ពីជនបរទេស០៥នាក់ កំពុងដើរ នៅចំណុចមុខផ្សាររាត្រីមាត់ទន្លេ ដោយធ្វើសកម្មភាពពីរនាក់ឈ្មោះឈីត។

លើកទី២៖ ឆក់បានទូរស័ព្ទដៃ០១គ្រឿងម៉ាក iPhnone7 ពីជនបរទេសប្រុសម្នាក់ នៅចំណុចមុខសណ្ឋាគារកាំបូឌីយ៉ាណា ដោយធ្វើសកម្មភាពជាមួយឈ្មោះឈីត។

លើកទី៣៖ បានធ្វើសកម្មភាពជាក្រុម ឆក់កាបូបពីជនបរទេសម្នាក់ កំពុងដើរនៅខាងលិចផ្សារទួលទំពូង តែមិនបានសម្រេច។

លើកទី៤៖ ឆក់បានទូរស័ព្ទ០១គ្រឿងម៉ាក iPhone6 ពីជនបរទេសម្នាក់កំពុងជិះកង់ នៅចំណុចខាងត្បូងវិមានឯករាជ្យ ដោយធ្វើសកម្មភាពជាមួយឈ្មោះឈីត។

លើកទី៥៖ ឆក់បានកាបូបដៃ០១ មានប្រាក់១៦០ដុល្លារ ពីជនបរទេសម្នាក់ នៅចំណុចខាងក្រោយផ្សារ អ៊ីអន ដោយធ្វើសកម្មភាពជាមួយឈ្មោះឈីត។

លើកទី៦៖ ឆក់បានទូរស័ព្ទ០១គ្រឿងម៉ាក iPhone6 និងកាបូបមានប្រាក់៣០០ដុល្លារ ពីជនបរទេស នៅចំណុចខាងក្រោយផ្សារអ៊ីអន ដោយធ្វើសកម្មភាពជាក្រុម។

លើកទី៧៖ បានធ្វើសកម្មភាពឆក់កាមេរ៉ា ពីជនបរទេសកំពុងជិះរ៉ឺម៉កម៉ូតូកង់បី នៅចំណុចគល់ស្ពានខាងកើតណាហ្កា តែមិនបានសម្រេច ដោយធ្វើសកម្មភាពជាក្រុម។

លើកទី៨៖ ឆក់បានទូរស័ព្ទដៃ០១គ្រឿង ម៉ាក OPPO ពីជនបរទេស នៅចំណុចម្តុំបឹងកេងកង ដោយធ្វើសកម្មភាពជាក្រុម។

លើកទី៩៖ បានធ្វើសកម្មភាពជាក្រុម ឆក់កាបូបស្ពាយពីជនបរទេស នៅចំណុចហាងកូរ៉េ ជិតក្លឹបកំសាន្តរ៉ុក តែមិនបានសម្រេច។

លើកទី១០៖ ឆក់បានកាបូប០១មានប្រាក់ ៧០០ដុល្លារ ពីជនបរទេសម្នាក់ នៅចំណុចជិតផ្សារបឹងត្របែក ដោយធ្វើសកម្មភាពជាក្រុម។

លើកទី១១៖ បានធ្វើសកម្មភាពជាក្រុម ឆក់កាបូបជនបរទេសកំពុងដើរ នៅចំណុចម្តុំពេទ្យចិន តែមិនបានសម្រេច។

លើកទី១២៖ នៅវេលាម៉ោងប្រហែល០៣៖០០នាទីយប់រំលងអាធ្រាត្រឈានចូលថ្ងៃទី១០ ខែធ្នូ ឆ្នាំ២០១៧ រូបខ្លួន (មិត្ត ភារម្យ) រួមជាមួយឈ្មោះឈីត និងឈ្មោះជ្រុយ ប្រើប្រាស់ម៉ូតូ០២គ្រឿង បានធ្វើសកម្មភាពឆក់កាបូបស្ពាយ ពីជនជាតិថៃម្នាក់ បានសម្រេច នៅចំណុចរង្វង់មូលសម្តេចសង្ឃជួនណាត ហើយព្រឹកឡើងម៉ោងប្រហែល០៦៖០០នាទីព្រឹក ទើបជួបជុំគ្នា នៅទំនប់បឹងទំពុន ក្បែរលូទឹកស្អុយ ដើម្បីបើកកាបូបចែកគ្នា ដោយក្នុងនោះមានប្រាក់ដុល្លារចំនួន ៣,០០០ដុល្លារអាមេរិក, ប្រាក់ថៃចំនួន៨,០០០បាត, កាក់កាស៊ីណូ ចំនួន ៣,៤០០ដុល្លារ បន្តោងខ្សែក ចំនួន០២ និងមានប៉ាស្ព័រចំនួន០២ បានធ្វើការចែកគ្នាស្មើ រួចក៏បែកគ្នា រហូតដល់ម៉ោងប្រហែល១៥៖០០នាទី ឈ្មោះ មិត្ត ភារម្យ ក៏ត្រូវកម្លាំងអាវុធហត្ថខណ្ឌដូនពេញស្រាវជ្រាវ និងឃាត់ខ្លួនបានតែម្តង រីឯបក្ខពួកនៅសល់ សមត្ថកិច្ចកំពុងតាមប្រម៉ាញ់បន្ត។

គួរឲ្យកត់សម្គាល់ផងដែរ ក្នុងមួយរយៈនេះ កម្លាំងអាវុធហត្ថទូទាំងរាជធានីភ្នំពេញ បានបង្កើនសកម្មភាពបង្ក្រាបក្រុមចោរឆក់យ៉ាងខ្លាំង ដោយសមត្ថកិច្ចបានពង្រាយកម្លាំងពួនស្ទាក់ទាំងយប់ទាំងថ្ងៃ តាមប្រម៉ាញ់ក្រុមចោរឆក់ទាំងនេះ និងបង្ក្រាបបាន ជាបន្តបន្ទាប់ដូចភ្លៀងរលឹម រហូតដល់ធ្វើឲ្យនាយការិយាល័យម្នាក់ដួលរបួសធ្ងន់ធ្ងរ នាំយកទៅព្យាបាលនៅឯបរទេស ហើយសូម្បីតែលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ចាការ កងរាជអាវុធហត្ថរាជធានីភ្នំពេញ ក៏បានប្រដេញ តាមចាប់ក្រុមចោរឆក់ទាំងនេះ បានដោយផ្ទាល់ដៃ រហូតដួលរបួសដៃជើងដូចគ្នាផងដែរ៕ប្រភព​Freshnews